Прэзентацыя кніг Мікалая Іваноўскага32>
14 лістапада ў Гудзевіцкім музеі прайшла прэзентацыя новых кніг мясцовага пісьменніка Мікалая Пятровіча Іваноўскага. Ініцыятарам гэтага мерапрыемства выступіла старшыня пярвічнай арганізацыі “Беларускі саюз жанчын” і надзейны сябар, дарадца і памочнік Мікалая Пятровіча – Ірэна Адольфаўна Жукоўская. Сабраліся на сустрэчу людзі неабыякавыя да яго творчасці. Распачала гэтае мерапрыемства дырэктар музея – Вікторыя Сяргняўна Палойка. Яна адзначыла, што прэзентацыя гэтых кніг ужо прайшла на базе літаратурнага клуба “Экватар” у г.Мінску, а сёння ўсе прысутныя маюць магчымасць пазнаёміцца з навінкамі ў нашым музеі.
Да ўвагі была прадстаўлена вельмі змястоўная і цікавая кніга “Загадкі на ўсе выпадкі”. Аўтар запрашае маленькіх чытачоў здзейсніць падарожжа па старонках сваёй новай кнігі. Усе матэрыялы размешчаны тут згодна беларускаму алфавіту. Кніга вельмі прыгожая, багата ілюстраваная, з нацыянальным беларускім каларытам – на кожнай яе старонцы. Тэматыка загадак самая розная: пра жывёл, пра птушак, пра расліны і пра многае іншае. Гэты зборнік будзе цікавы не толькі маленькім, але і дарослым чытачам.
І яшчэ адзін зборнік вершаў “Сцяжынка дзяцінства” падараваў свайму чытачу Мікалай Пятровіч. Гэта шчыры расповед пісьменніка пра былое, пра перажытае, пра надзённае. “Куфар беларускай паэзіі папоўніўся чарговымі маімі вершамі і байкамі, можа, і не дасканалымі, але прапушчанымі праз душу” – піша аўтар.
Шмат твораў Мікалай Пятровіч зачытаў сам, а некаторыя прагучалі з вуснаў аматараў яго творчасці.
Шчырыя пажаданні моцнага здароўя і плёну ў працы выказала старшыня Гудзевіцкага сельскага Савета Кацярына Вітальеўна Басінская, якая дарэчы, выступіла ў ролі карэктара.
Сустрэча прайшла вельмі цёпла, прысутныя акунуся ў сваё мінулае, узрушлі ў памяці тое, што для кожнага з’яўляецца вялікім скарбам душы.